|
CCNA Security
|
|
|
CCNA Security
CCNA Security არის Cisco-ს აკადემიის ქსელის უსაფრთხოების კურსი. მასში განხილულია კომპიუტერული ქსელის და მისი მომხამრებლების მიმართ არსებული თანამედროვე საფრთხეები. იგი შეასწავლის სტუდენტებს, თუ როგორ უნდა მოხდეს მცირე, ან საშუალო ზომის ორგანიზაციის ქსელის დაგეგმვა, მონიტორინგი და დაცვა როგორც ქსელური აპარატურის, ასევე მომხმარებლის კომპიუტერის დონეზე.

აღნიშნული კურსი განკუთვნილია სტუდენტებისთვის, რომელთაც გავლილი აქვთ CCNA სასწავლო კურსი, ან გააჩნიათ კომპიუტერულ ქსელებთან მუშაობის გამოცდილება და სურთ გაიღრმავონ ცოდნა. ან შეიძინონ ახალი უნარ–ჩვევები კომპიუტერული ქსელის უსაფრთხოების და დაცვის საკითხებში. ეს კურსი ასევე განკუთვნილია მათთვის, ვისაც სურვილი აქვთ ჩააბარონ "Implementing Cisco IOS Network Security" (IINS) სასერტიფიკატო გამოცდა და მიიღონ Cisco–ს საერთაშორისო ინდუსტრიული CCNA Security სერტიფიკატი. აღნიშნული გამოცდა ფასიანია, მაგრამ Cisco–ს ქსელური აკადემიის კურსდამთავრებულებს შეუძლიათ ისარგებლონ 50%–იანი ფასდაკლების ვაუჩერით, რომელსაც ისინი მიიღებენ CCNA Security კურსის წარმატებით დასრულების შემთხვევაში.
კურსის ხანგრძლივობა და სასწავლო პროცესი
CCNA Security სასწავლო კურსის ხანგრძლივობაა 2,5–3 თვე.

ლექციები ტარდება კვირაში 3–ჯერ. ლექციის ხანგრძლივობაა 2–2,5 საათი.

ლექციების ჩატარების დრო – 17:00 საათი.

ლექციები ტარდება ქართულ ენაზე. სასწავლო მასალა წარმოდგენილია ინგლისურ ენაზე ელექტრონულ ფორმაში. აღნიშნული მასალა ხელმისაწვდომია სტუდენტისთვის Cisco–ს აკადემიის სასწავლო პორტალიდან, რომელშიც სტუდენტები რეგისტრირდებიან სასწავლო კურსზე ჩარიცხვის შემდეგ.

კურსის განმავლობაში სტუდენტები აბარებენ CCNA Security კურსის შუალედურ ტესტებს და კურსის ბოლოს ფინალურ ტესტს. შუალედური და ფინალური ტესტების წარმატებით ჩაბარების შემთხვევაში, სტუდენტი მიიღებს Cisco–ს ქსელური აკადემიის CCNA Security კურსის დასრულების შესახებ დამადასტურებელ სერტიფიკატს. სურვილის შემთხვევაში სტუდენტს შეუძლია ჩააბაროს IINS საერთაშორისო გამოცდა და მიიღოს შესაბამისი ინდუსტრიული სერტიფიკატი. ასოციაცია "გრენა"–ს ბაზაზე ფუნქციონირებს Pearson VUE საერთაშორისო საგამოცდო ცენტრი, რომლის მეშვეობითაც ხდება IINS გამოცდის ჩაბარება.
კურსის ღირებულება და გადახდის პირობები
CCNA Security კურსის ღირებულება – 600 ლარი

სწავლის საფასურის გადახდა უნდა მოხდეს სწავლის დაწყებიდან არაუგვიანეს 15 დღის განმავლობაში.

უმაღლესი სასწავლო დაწესებულებების სტუდენტებს და სკოლის მოსწავლეებს შეუძლიათ მიიღონ 20%–იანი ფასდაკლება, თუ ისინი სწავლის დაწყებისთანავე წარმოადგენენ შესაბამის დამადასტურებელ ცნობას სასწავლო დაწესებულებიდან.

თუ სტუდენტი დროულად არ გადაიხდის სწავლის საფასურს, მას შეუწყდება Cisco–ს ქსელურ აკადემიაში სწავლის გაგრძელების უფლება.
კურსში განხილული საკითხები
CCNA Security კურსი შედგება როგორც თეორიული, ასევე პრაქტიკული მეცადინეობებისგან Cisco–ს სხვადასხვა მოწყობილობებზე. მასში განხილულია ყველა ის მექანიზმი და შესაძლებლობა, რომლებიც გააჩნია Cisco–ს მარშრუტიზატორებს და კომუტატორებს კომპიუტერული ქსელის მოწყობილობების და ქსელში გადაცემული ინფორმაციის დასაცავად. განხილულია Cisco ASA Firewall მოწყობილობის საწყისი კონფიგურაცია და სხვადასხვა ინსტრუმენტებიც, რომელთა მეშვეობითაც შესაძლებელია ქსელში მიმდინარე პროცესების მონიტორინგი და უსაფრთხოებასთან დაკავშირებული პრობლემების აღმოჩენა.

კურსი შედგება შემდეკი საკითხებისგან:

  • თანამედროვე ქსელის უსაფრთხოების პრობლემები
  • ქსელური მოწყობილობების დაცვის მექანიზმები
  • აუტენტიფიკაცია, ავტორიზაცია და აღრიცხვა (AAA)
  • ფაიარვოლური ტექნოლოგიების გამოყენება
  • შეტევების თავიდან აცილების მექანიზმების იმპლემენტაცია
  • ლოკალური ქსელების დაცვა
  • კრიპტოგრაფიული სისტემები
  • VPN ტექნოლოგიის კონფიგურაცია
  • უსაფრთხო ქსელების მართვა
  • Cisco ASA Firewall მოწყობილობის კონფიგურაცია



კურსში გამოყენებული სასწავლო მასალა და დამატებითი კომპონენტები
სასწავლო კურსში გამოყენებულია Cisco–ს ქსელური აკადემიის მიერ შემუშავებული ოფიციალური სასწავლო მასალა, რომელიც წარმოდგენილია მხოლოდ ინგლისურ ენაზე. მისი განახლება ხდება პერიოდულად, რათა მასში ასახული იყოს თანამედროვე კომპიუტერული ქსელების უსაფრთხოების ტექნოლოგიები.

პრაქტიკული უნარ–ჩვევების გაღრმავებისთვის და საშინაო დავალებების შესრულებისთვის სტუდენტებს ასევე ეძლევათ Cisco–ს აკადემიის მიერ შექმნილი სპეციალური კომპიუტერული პროგრამის "Packet Tracer"–ის გამოყენების საშუალება, რომელიც უზრუნველყოფს კომპიუტერული ქსელების მოდელირებასა და სიმულაციას.

სასწავლო კურსის ლექციების 30% შედგება პრაქტიკული ლაბორატორიული სამუშაოებისგან, რომელთა მსვლელობისას სტუდენტებს ეძლევათ Cisco–ს მოწყობილობებთან მუშაობის საუკეთესო შესაძლებლობა, რაც დაეხმარება მათ თეორიული საკითხების უკეთ აღქმასა და გააზრებაში.
CCNA Security კურსზე რეგისტრაციის წესები
CCNA Security კურსზე მოსახვედრად სტუდენტმა უნდა გაიაროს ელექტრონული რეგისტრაცია. სარეგისტრაციო ფორმის შევსების და წარდგენის შემდეგ, მსურველი ავტომატურად ხდება Cisco–ს აკადემიის CCNA Security კურსის აბიტურიენტი, რის შესახებაც მას ეგზავნება ავტომატური დამადასტურებელი ელექტრონული წერილი სარეგისტრაციო ფორმაში მითითებულ ელ–ფოსტის მისამართზე.

იმისათვის, რომ აბიტურიენტი ჩაირიცხოს CCNA Security სასწავლო კურსზე, მან უნდა ჩააბაროს ინგლისურ ენაში ტესტირება. აღნიშნული ტესტირება ტარდება ჩვენს აკადემიაში, აბიტურიენტების რეგისტრაციის დასრულების შემდეგ. ტესტირების ზუსტ თარიღს და დროს აბიტურიენტებს პირადად შეატყობინებენ ელექტრონული წერილის და ტელეფონის მეშვეობით.

ინგლისური ტესტი უფასოა და მისი გავლა სავალდებულოა ყველა აბიტურიენტისთვის, ვისაც სურვილი აქვს ჩაირიცხოს სასწავლო კურსზე, რადგან ამ ტესტით ხდება ინგლისური ენის ცოდნის მათი დონის შემოწმება. იმის გამო, რომ სასწავლო მასალა და ყველა ის ტესტები, რომლებსაც სტუდენტები აბარებენ სწავლის პროცესში წარმოდგენილია მხოლოდ ინგლისურ ენაზე, ინგლისურის ცოდნა აუცილებელია საკმაოდ მაღალ დონეზე.


დამატებითი ინფორმაციისთვის დაგვიკავშირდით საკონტაქტო ტელეფონის ნომერზე ან ელ–ფოსტის მისამართზე.
CCNA Security კურსზე რეგისტრაციისთვის გადადით "რეგისტრაციის" გვერდზე.